Dreifing og kynning
Dreifing - kynning - kvikmyndahátíðir
Eitt af þremur áherslusviðum MEDIA áætlunarinnar er alþjóðleg dreifing á evrópsku myndefni.
Dreifing skiptist í:
- Dreifing kvikmynda
- Dreifing sjónvarpsefnis
- Stuðningur við kynningu á hátíðum og mörkuðum og samvinna kvikmyndahátíða
- Stuðningur við kynningu á kvikmyndahátíðum í löndum utan MEDIA áætlunarinnar
- Stuðningur við kvikmyndahátíðir
- Stuðningur við samtök kvikmyndahúsa
Stuðningur við dreifingu evrópskra kvikmynda
Stuðningi við dreifingu evrópskra kvikmynda er skipt í þrjú meginkerfi: valkerfið, sjálfvirka kerfið og sjálfvirkt kerfi fyrir sjálfstæða söluaðila (sales – agents)/umboðsmenn.
Valkerfið
Minnst fimm evrópskir dreifendur þurfa að standa saman að umsókn um styrk til dreifingar á nýlegri evrópskri kvikmynd sem er ekki frá heimalandi umsækjenda, en frá landi sem á aðild að MEDIA áætluninni. Framleiðslukostnaður verður að vera undir 3 milljón evrum. Ef framleIðslukostnaður er á bilinu 3-15 milljón evrur, verða minnst 7 dreifendur standa saman að umsókn. Engir styrkir eru til fyrir dýrari myndir. Framleiðsluland kvikmyndar er skilgreint eftir punktakerfi sem er birt framarlega í leiðbeiningum með öllum umsóknargögnum. Eitt af skilyrðum er að ekki má sýna kvikmyndina opinberlega fyrr en í fyrsta lagi á skiladegi umsóknar og í síðasta lagi 18 mánuðum síðar.
Skilafrestur umsókna er 1.desember 2009 og 1. apríl og 1. Júlí 2010.
Sjálfvirka kerfið
Í júní 1997 var sett á laggirnar sjálfvirkt styrkjakerfi sem nýtist dreifendum evrópskra kvikmynda. Kerfið virkar þannig að ákveðin upphæð er tengd hverjum seldum aðgöngumiða á evrópska kvikmynd, sem ekki er frá heimalandi dreifanda. Styrkurinn sem þannig reiknast dreifanda er skilyrtur, þannig að dreifandi verður að nýta hann til að setja í framleiðslu, í forkaup (minimum garanty) eða við kostnað á dreifingu annarrar evrópskrar kvikmyndar, sem ekki er frá heimalandi dreifanda.
Skilafrestur var 30. apríl 2010 og verður á svipuðum tíma næsta vor.
Stuðningur við söluaðila (sales – agents)/umboðsmenn
Fyrirtæki söluaðila/umboðsmanna getur sótt um sjálfvirkan styrk sem byggir á árangri fyrirtækisins á Evrópumarkaði yfir ákveðið tímabil. Söluaðili/umboðsmaður verður að hafa samning við framleiðendur sem gefur honum rétt til dreifingar á minnst 8 kvikmyndum í að minnsta kosti 10 löndum sem taka þátt í MEDIA áætluninni.
Styrkurinn er skilyrtur til að borga hluta af kostnaði við forkaup (minimum garanty), eða til að mæta kynningarkostnaði fyrir nýjar evrópskar kvikmyndir.
Síðasti skilafrestur umsókna var 30. apríl 2010
Ný umsóknargögn eru væntanleg og verður hægt að nálgast hér.
(upplýsingar um WinZip þjöppun má fá hér)
Stuðningur við dreifingu sjónvarpsefnis
Hægt að sækja um styrk fyrir allt að 12,5% af framleiðslukostnaði við leikið sjónvarpsefni ( minnst 50 mín. að lengd), og teikni-og hreyfimyndir (minnst 24 mínútur). Þá er hægt að sækja um 20% af framleiðslukostnaði fyrir heimildarmyndir (minnst 25 mín. að lengd) Meðal helstu skilyrða er:
Að samningur um dreifingu verði gerður við að minnsta að kosti 3 sjónvarpsstöðvar á þremur málsvæðum. Fleiri sjónvarpsstöðvar auka möguleika á styrkveitingu.
Þegar sótt er um verður að vera komin 50% fjármögnun á verkefninu. Verkefni sem komin eru með fulla fjármögnun geta ekki fengið styrk. Fyrirtækið getur sótt um í fyrsta lagi sex mánuðum fyrir fyrsta tökudag og í síðasta lagi á fyrsta tökudegi.
Sýningarréttur sjónvarpsstöðvanna má ekki vera lengri en 7 ár ef um er að ræða forsölu en mest 10 ár ef að sjónvarpstöðin er meðframleiðandi.
Helmingur af framleiðslukostnaði verður að vera fjármagnaður frá Evrópu.
Þá er í lagi að myndin verði sýnd í kvikmyndahúsi, ef að frumsýning hennar er í sjónvarpi fyrst.
Skilafrestir umsókna er 27. nóvember 2009, 5. mars og 28. Júní 2010.
Stuðningur við kynningu á kvikmyndahátíðum í löndum utan MEDIA áætlunarinnar
Markaðsfyrirtæki og/eða stofnanir sem vinna á evrópskum eða alþjóðlegum markaði geta sótt um styrk til að að kynna evrópskar myndir á hátíðum sem haldnar eru í löndum sem taka ekki þátt í MEDIA áætluninni Mest er veittur styrkur sem nemur 50% af kostnaði.
Skilafrestur umsókna var 12. ágúst 2009.
Ný umsóknargögn eru væntanleg.
Stuðningur við kynningu á hátíðum og mörkuðum, og samvinnuverkefni.
Markaðsfyrirtæki og/eða stofnanir sem vinna á evrópskum markaði geta sótt um styrk uppí kostnað til að halda viðburði (ráðstefnur, markaði osfr.) oftast í tengslum við stærri hátíðir svo sem MILIA, MIPCOM, MIPTV, CANNES, SUNNY SIDE OF THE DOC, ANNECY, AMSTERDAM osfrv. Mest er veittur styrkur sem nemur 50% af kostnaði. Filmkontakt Nord og media-stands.eu hafa margoft fengið styrk og nýtt hann til að setja upp kynningarbása á hinum og þessum mörkuðum. Jafnframt hafa þau notað styrkinn til að greiða niður ferða- og uppihaldskostnað kvikmyndaframleiðanda sem sækja markaðina. Þá er hægt að sækja um styrk til að kynna evrópsk verkefni í undirbúningi eða fullkláruð verkefni. Hægt er að sækja um styrk til að safna upplýsingum á stafrænu formi um evrópska kvikmyndagerð fyrir fagfólk og loks geta ýmis samtök (frá minnst 15 aðildarríkjum MEDIA áætlunarinnar) sótt um styrki til evrópskra kynninga.
Skilafrestur umsókna:
7. desember 2009 vegna viðburða frá 1. Júní – 31. Desember 2010
30. júní 2010 vegna viðburða frá 1. janúar 2011 - 31. maí 2011
Stuðningur við kvikmyndahátíðir
Kvikmyndahátíðir geta sótt um styrk fyrir allt að 50% fyrir ákveðna kostnaðarliði. Ekki er lengur skilyrði er að hátíðin sé í einhverjum samtökum kvikmyndahátíða, en styrkir umsóknina.
Næsti umsóknarfrestur fyrir kvikmyndahátíðir verður :
27. nóvember 2009 fyrir hátíðir á tímabilinu 1. maí – 31. október 2010
30. apríl 2010 fyrir hátíðir á tímabilinu 1. Nóvember 2010 – 30. apríl 2011
Stuðningur við samtök kvikmyndahúsa
Öll kvikmyndahús með einum sal verða að sýna minnst 30% af evrópskum kvikmyndum sem koma ekki frá heimalandi og kvikmyndahús með mörgum sölum verða að sýna minnst 33% af evrópskum kvikmyndum sem koma ekki frá heimalandi til að geta gengið í samtökin “Europa cinemas”.
Samtökin veita meðlimum styrki og gefa út upplýsingar um hvert kvikmyndahús sem gengur í samtökin.
Umsóknarfrestur til að ganga í Europa Cinemas er yfirleitt tvisvar á ári.